" Il presente articolo( già pubblicato sulla rivista IL MONTE anno III N. 1 del 2006 con lo stesso identico contenuto) non è cronaca né storia, ma libera ricostruzione narrativa dei tumulti popolari del 15 gennaio 1944 a Montella-
in memoria di tristi tempi, della dignità di una comunità ferita e della signorilità e umanità di un gesto ispirato alla comprensione e al perdono al posto della rivalsa. A Montella e alla sua gente".
A la casa re Cungittìna non mangàva niéndi. Li figli, tutti gruóssi, ogni matina s'ab-biàvano pe’ lo patre ngambàgna e a la fine re la staggióne inghìano la casa re ogni grazia re Dio: la candina era chiéna re utti re vino, li maazzèi erano chini re patàne, re fasùli, re méla, re langèddre re pepàcchi sott'a r'acìto e de boccàcci re melognàme sott'uóglio.
Puro Cungittìna però tinìa la tessera pe’ ghi a piglià ro pane, la farina e la pasta ra quanno re guardie s’ erano presendàte ngimm'a r’ arie e s'erano pigliàto quasi tutta la ròbba pe’ ro portà a l'ammàsso. ‘Na matina verètte re criatùre re Rusinèlla, la vicina re casa, pe’ ‘no celatiéddro mmano e decètte:
- Picciri', che vi mangiàti?
- Pataniéddri!
- E aiéri sera?
- Pataniéddri!
Lo iuórno ròppo re tornào a bberé pe’ lo celatiéddro mmano e re criatùre senza re si fà addommannà riciéro:
- Pataniéddri, za Congè'!
- Ma li pataniéddri si còceno a li puórci!
- A casa ne re mangiàmo nui pecché lo puórco no ng'è!
- Ma ro tinìti ro pane, li sausicchi, re sopersàte e lo casicavàddro?
- Nóne, nui lo puórco no’ lo tinìmo e mango re bbacche e mango la terra!
Cungittìna rimanètte a penzà e po’ se ne trasètte rindo tocolànno la capo.
Pìgliati la tessera mia - recètte lo iuórno ròppo a Rusinèlla - va' a lo Cumùne e fatti rà ro pane chi tocca a me. A nui non ni manga niéndi, ne ‘ngraziàmo Dio, tu tiéni li picciòtti ra crésce e la tessera tua non t'abbàsta.
Rusinèlla ètte a lo Cumùne pe’ si fà métte lo tìmbaro, ma lo Piccirìddro, ra rèto a lo spurtiéddro, recètte ca non era cosa, aìa vinì la patrona re la tessera ‘npersóna. Lo iuórno ròppo tornào a ghi e puro senza pane s'arritirào. E accussì pe’ ‘na sittimàna sana. Ro decètte a Cungittìna.
- Nge pènzo io - responnètte questa. Accussi lo iuórno ròppo Cungittina assètte ra la casa com'a ‘na vipera pe’ lo ciglio ra fòre.
Congè' addo’ vai - recètte Mariannina - pe 'ssi capiddri ‘ngrifàti com'a ‘na riàola?
- A lo Cumùne, stammatina appiccio tutto e tutti si non danno ro pane a comma Rusi-nèlla.
- Vèngo puro io - responnètte Mariannina - stammatina tèngo òglia re menà mazzàte, l'àggia fà scortà lo verbale chi mi faciéro a lo mulino.
E s'abbiàro, Cungittìna, Mariannina e Rusinèlla: una era àota e férme, parìa ‘na io-mènda, n'ata era vascia e chiatta com'a ‘na ottecèddra e Rusinèlla parìa l'anima re lo Preatòrio, longa e secca com’ a ‘na saràca.
Addo’ curriti? - recètte la moglière re lo Caraonàro ‘Nnandi Corte.
- A lo Cumùne, stammatina òlano palàte, òtati arrèto e bbiéni pe’ nui!
E faciéro a quatto. Quanno arrivàro mmiézzo a la chiazza erano arrevendàte’ ‘na vin-dìna.
Trasiéro rind'a lo Cumùne alluccànno, Cungittìna ‘nnandi, Mariannina arrèto e r'ate chiù arrèto angòra. Recètte Cungittìna a lo Piccirìddro:
- Mitti lo tìmbaro ngimma a 'sta tessera pe fà piglià ro pane a comma Rusinèlla ca re criatùre sua si mòreno re fame!
- Non si può, bisogna rispettare la legge!
- E la legge tua che dice, ca re criatùre s'ànna murì re fame? Mitti 'sso tìmbaro qua si ti vuó arritirà sano a càseta momàni!
- Non si può, la legge lo vieta!
- Mo te la rao io la legge - recètte Cungittìna - a te e a tutti ‘ssi scornacchiàti chi stan-no qua ngimma! Accumingiào a sceppà quadri ra piétto a re mura e re menào ab-bàscio mmiézzo a la via, pigliào carte e cartèlle ngimm'a li taulìni e re facètte olà pe’ l'aria, aprètte tutte re porte e addo’ trovava carte r'afferràva e re ghiettàva mmiézzo a la chiazza. Ioccàvano carte.
Afferràti tutto e menàtiro abbàscio - ricìa a r'ate fémmene, c'acchiappàro sègge, taulìni e màchine pe’ scrive e re ghiettàro pe’ re fonèstre.
- E mo’ - recètte a lo Piccirìddro - tocca a te. L'afferrào, lo pigliào ‘nbrazza, scennètte abbàscio, passào ra l'ata parte re la via e lo ètte a menà rind'a la vasca.
Ràtimi ‘no mbicciariéddro
- recètte - e dind'a ‘no momèndo ‘nnandi a lo Cumùne ab-biào ‘na vègna!
Re carte ardìano e lo sacrestàno re la Ghiésia Madre cumingiào a sonà re cambàne a fuoco! Curriéro gènde ra tutte re parti, la chiazza arrevendào ‘no teatro: re fémmene erano r’ attrici e l'uómmini uardàvano attuórno e nzorfàvano. Certi addriàvano ve-rènno re mugliéri accussì ndossecàte. Cert'ati si rosecàvano lo fécato penzànno ca la raggia re re mugliéri portava ranno puro a loro. E già penzàvano re li fà ‘no paliatóne quanno s arritiràvano a re case; e s'allondanàvano pe’ lo scuórno e pe’ non si fà veré ra cocche alandòmo chi spiava annaccovàto arrèto a re fonèstre e preàva Dio ca re fémmene non pigliàvano la via re lo pertóne suo. Cert'ati se la rirìano e si uardàvano lo teatro.
Re fémmene attuórno a la vègna allucàvano e l'allùcchi si sindìano ngimma Sassetà-no, come recètte picca iuórni ròppo ‘no crapàro chi pascìa re crapi ra quére parti.
- Ulìmo ro pane!
- Pane senza puche rindo!
- Pane pe’ re criatùre!
- N'ànno sporpàti fino a r òssa !
- S'ànno zucàto lo sango nuósto!
- Re bbulìmo veré mbiccàti a la téglia!
- Mariuóli! Chi zappa e chi s'abbótta!
- La ròbba è la nòsta, no’ ro bbulìmo chiù annaccoà, no’ bbulimo mangià chiù com'a li mariuóli! 
La paura ca si futtìano la ròbba re facìa angòra cacà sotta e aìa fatto saglie lo sango ‘ngapo a parecchie re loro. Cungittìna si ricordava sèmbe re quanno aìa portàto la ròbba re la cannacàmbera rind'a la cestèrna sott' a la casa re Rusinèlla e certi sacchi r'era iùti a annaccoà sott' a ‘na sckaffa abbàscio a lo Ponde re lo iùmo e la notte non durmìa pe’ la paura ca la chiéna se re portava. Quanno re guardie erano iùte a la casa nge l'aìano mista ngimma e sotta senza trovà niéndi.
Acchiappàtivi quésso!
La sòcra s'era abbusckàto no’ maciniéddro e la notte macinava la ròbba. Assìa ‘na fa-rina férme mesckàta pe’ la vrénna, ma era bona lo stesso pe’ fà stése e cecalùccoli.
E n'ata fémmena tinìa lo rènde amaro angòra pe’ quanno lo uàrdio cumunale l'aìa ac-chiappàta pe’ lo ciuccio càrrico re farina e no’ nge l'aìa fatta passà liscia. Ricìa ca ‘na notte, r’accordo pe’ lo molenaro re lo Ponte re lo iùmo, era iùta a macinà ‘na sarma re ròbba e se ne stìa venènno, cupe cupe, pe’ lo ciuccio càrrico. Abbàscio a la Serra ‘no uàrdio cumunale era assùto, com’a ‘no spirito, ra reto a ‘no muro e l’aìa fatto lo ver-bale. Si ulìa piglià la farina pe’ ro portà a l’ammàsso, ma po’ s'era accondendàto pe’ ‘na pezzóttola re caso, ‘no paro re casicavàddri, ‘no saccutiéddro re farina, ‘no boc-cióne r'uóglio e ‘no piézzo re lardo.
A la facci sua! 
Lo uàrdio aìa appicciàto lo verbale, ma la sòcra la ulìa accire lo stesso pecché s'era fatta acchiappà.
‘N'ata ricìa ca s'aìano futtùte re tiàne, re brasère, re caoràre e li ruóti re rama. Era arri-vato, picca misi prima, ‘no uàrdio ‘npersóna a tozzolà a la casa pecché l'aìano ritto ca éssa tinia ‘na caoràra re rama addo’ uddrìa re primmaròle.
- Dammi quella caldaia! — aìa ritto trasènno, e se la stìa portànno, ma éssa l'aìa affer-ràta pe’ ‘na màneca e, tira ra qua tira ra drà, no' l'aìa lassàta. Re màneche se ne stìano venènno. Allora lo uàrdio, pe’ ‘no chiuóvo, l'aìa spertosàta. 
- Spertosàta e com'è, me la tèngo - l'aìa ritto - ma tu si' ‘no fetènde, uàrdio e bbuóno!
E n'ata, alluccànno com'a ‘na sguaiàta, se la pigliàva pe’ chi s'era futtuti l'avricchìni e lo laccittìno r'oro. S'era appena sposata quanno ‘no iuórno l'aìano chiamata a la ca-serma recènnoli re portà tutto r'oro ca tinìa pecché serevìa pe’ spesà li sordàti nguèrra.
- V'aìti pigliàto marìtimo, mò ulìti puro r'oro! Io oro non ne tèngo e si vinìti a casa v’appiccio! Pigliàtivi r'oro re re mugliéri òste! E se n'era iùta. Ma no ng'era stato niéndi ra fa’ pecché li carbiniéri tinìano li spiùni e allora s’ erano presendàti a la casa e se r'aìano pigliàto pe’ la forza. E mò ‘nnandi a lo Cumùne essa attizzava ro fuoco pe’ li fà scortà tutti li tuórti e re malepatènze: carbiniéri, uàrdii cumunàli, alanduómini, uardiàni, potestà e ‘mbiegàti erano tutti nimici pe’ loro.
Re carte ‘nnandi a lo Cumùne erano arrevendàte ‘no mendóne re cénnere, ma re fémmene non s’ erano accoetàte. Ra miézzo a loro cocchirùna cumingiào a alluccà:
- Currìmo a li palazzi re li signùri!
- Pigliàmoni tutto quéro ca trovàmo!
- La ròbba ca tiéno è la nòsta!
- Menàti mazzàte puro a li uardiàni! E s'abbiàro pe’ la chiazza a mmónde arrobbànno rind'a ‘no furno pane, farina e pasta ra rind'a la màrtora.
Si fermàro sott'a ‘no palazzo, ma lo pertóne era chiuso.
Pigliàmo quiro traino - recètte Mariannìna - e sfonnàmo lo pertóne!
Aviramènde lo pigliàro e cumingiàro a menà bòtte. Vatti ‘na òta, vatti róe e bbatti tre, lo pertóne si sbalangào. Tutte re fémmene si ulìano menà rind' a li maazzèi, ma Cun-gittìna e Mariannìna re fermàro recènno ca s’ aìana fà parti iuste. Apriéro re porte e cumingiàro a sparte. A chi riéro ‘no casicavàddro, a chi ‘no prisùtto, a chi ‘na sèddro-la re sausicchi, a chi ‘no saccutiéddro re farina, a chi ‘na sacchètta re ròbba e a chi ‘no piézzo re lardo. Ng'era grazia re Dio pe’ tutti. Ma quére chi erano rimaste fòre e non aìano acchiappàto angòra niéndi, pe’ la paura ca la grazia re Dio finìa, cumingiàro a bottà, sfonnàro tutto, porte e portèddre, e chi potètte acchiappà acchiappào. Certi ua-gliùni sceppàro re terratóra re ‘no stipo, re ghinghiéro re castagne pistàte e se re por-tàro. Re sèddrole re sausicchi passàro pe’ capo a la gènde, ma non arrivàro mai fòre, la farina olào pe’ l'aria e ghianghiào tutto. Cungittìna e Mariannìna parìano róe mole-nàre, no’ bbirìano chiù niéndi e ghiastomàvano!
Arrivào lo uardiàno re lo palazzo, menào ‘na sckoppettàta a l'aria e tutte re fémmene squagliàro com'a re figlie re re quàgliare. Rui uagliùni si stìano portànno sano sano lo liétto addo’ rurmìa lo scioffè re lo patróne e n'ato si stìa portànno lo copertóne chi cummigliàva la Balilla, ma quanno sindiéro la sckoppettàta, lassàro tutto pe’ lo Riàr-bero a mmónde e va' te re futti pe’ dindo Raogliàno! E chi re bberètte chiù? Lo uar-diàno portào n'ata òta tutto rindo. Non si putiéro piglià re gomme re la Balilla pecché già se r'era pigliàte lo Governo e la machina era drà ferma ngimm' a quatto zizzi re lignàmo.
Róe fémmene erano arrivate fino a re catòia re lo palazzo, aìano fatto assi ‘no puór-co, aìano apiérti li cangiéddri re rèto e se lo portavano pe’ Sanzumiône a mmónde. Lo puórco non bbulia cammina, sgruffàva, ia facènno zighi zaghi pe’ trovà n'ato ca-tuóio addo’ s'infrocchià, e loro ammenazzàvano.
- Senza fà mbruógli 'sta òta - recètte una - lo puórco si sparte a metà, ‘na pacchìna a me e ‘na pacchìna a te. Non fà com'a quanno iémmo a fótte re gaddrìne a da lo Si-gnurino e tu ti pigliàsti li addri e a me mi risti certe patovàne spennacchiàte pe’ la scu-sa ca po’ mi facìano r òva. Re gaddrìne scacàro e chi ti rètte r'òva?
E l'ata responnètte: - Ma nui a casa simo ‘na morra re cristiàni, ui siti quatto atti, v'ab-bàstano ‘na spaddra, ‘na vendréscka, cocche sopersàta e cocche sèddrola re sausicchi.
- Non se ne face niéndi, o metà pirùno o lo puórco lo portàmo n'ata òta addo’ l'aìmo pigliàto! Chiuttòsto, come facìmo pe’ ni sparte la capo e la córa?
- La capo a me, la córa a te, e ti rao puro li quatto piéri pe’ fà la ielatìna!
- E marìtimo che dice quanno m'arritìro?: «'Sso puórco era senza capo!?»
Tramènde appattuliàvano lo puórco li rètte sacrerènza, girào arrèto a ‘na otàta, trovào la portèddra re n'uórto aperta e, va' te lo futti, scappào abbàscio a lo vaddróne.
E che lo lassàvano n'ata òta a lo patróne?! Li curriéro appriésso e lo portàro rind'a ‘no catuóio a ro sicùro.
Tramènde succirìa tutto questo, rui uómmini erano arrivati fino a re candine re lo pa-lazzo, aìano pigliàto ‘no utticiéddro re vino e se lo portavano brucolànno chiano chiano, pe’ la paura ca si scarrecàva e lo vino si iettàva.
Ròppo miezzoiuórno li carbiniéri iéro a tozzolà a re case re re fémmene chiù arrag-giàte e re portàro a la caserma. Quanno scurào, tozzolàro a la casa re Cungittìna chi s'affacciào recènno ca scinnìa sùbbito. Tramènde li carbiniéri aspettavano mmiézzo a la via, Cungittìna assètte ra la porta re l'uórto, scaravaccào lo muro e scappào a lo Serróne. Quéra notte rormètte a da ‘na parènde. Quanno li carbiniéri trasiéro, mittiéro la casa ngimma e sotta ma no’ la trovàro. Facètte la fuggiàsca pe’ ‘na sittimàna: passàva ra ‘na casa a n'ata, scaravaccàva mura, re iuórno stìa a ‘na casa, re notte a n'a-ta, lo iuórno appriésso a n’ ata angòra.
Ma lo patróne re lo palazzo era ‘no alandòmo non sulo re nòmo, ma puro re fatto. Ròppo cocche ghiuórno facètte menà lo banno ra Pizzacàora recènno ca, si portàvano a lo palazzo quéro c'aìano arrobbàto, re fémmene carcerate putìano tornà a re case.
Allora lo utticiéddro re vino, brucolànno brucolànno, tornào a la candina r'addo’ era assùto; lo puórco tornào a lo catuóio suo. ‘Na priggissióne re fémmene e de uómmini cumingiào a arrivà a lo palazzo.
- Patró', - recètte una - io acchiappài sulo ‘no vandisìno re castagne ‘nfornàte, te r’ aggio portate!
Riportatele! - responnètte lo patróne.
- Io acchiappài ‘no saccutiéddro re farina, àggio fatto li cecalùccoli e re stése e mò è arrevendàto miézzo.
- Con la farina rimasta farai altra pasta! - recètte lo patróne e ne mannào puro que-sta.
- A me mi toccào ‘na sèddrola re sausicchi - recètte n'ata pe re mano vacànde - ma re criatùre se r’ ànno mangiàti tutti.
- Hanno fatto bene ! - responnètte lo patróne e cangellào n'ato nòmo ngimm'a ‘na lib-brètta chi tinìa mmano. ‘No criaturo s'era portàto a la casa ‘na pezzòttola re caso e ‘no nzorfatùro. Lo patre re portào a lo palazzo e lo patróne si tenètte lo nzorfatùro e li rèt-te arrèto la pezzòttola re caso.
Si presendàro róe fémmene recènno: - Nui aìmo portàto lo puórco, lo uardiàno re lo palazzo l'à nghiùso rind'a lo catuóio. Nui però a casa non aìmo mai acciso ‘no puór-co, ulìamo fa’ assaggià rui sausicchi a re criatùre nòste chi mangiano sèmbe pata-niéddri.
Sarà fatto - recètte lo patróne - quando ammazzeremo i maiali vi manderò col figlio del fattore non solo le salsicce, ma anche altro. Ma voglio che sappiate che la roba che è in questo palazzo non è vostra, come gridaste quel giorno tra la folla. E voglio che sappiate pure che da questo palazzo non è uscita solo roba da mangiare!
Allora a lo palazzo arrivàro lambadàri, piéri re liétti, strungùni, séche, zappe, vanghe, velanzùni, statéle, allòrgi a muro e sègge... Parecchi stangiéddri però non tornàro chiù, ma lo patróne cangellào tutti li nomi ngimm'a la libbrètta e decètte a li carbiniéri ca, pe’ cundo suo, putìano mannà a re case tutte re fémmene angòra carceràte.
Quéra notte però lo patróne non dormètte pecché aìa visto nfacci e toccato pe’ mano la fame re tanda gènde.
La matina chiamào lo uardiàno c' affittàva li castagniti e re tiérri sua a li parsonàli e li recètte r'abbascià l'affitti.
- Se le annate saranno state scarse, rimanderai la riscossione del fitto all'anno suc-cessivo.
Lo iuórno ròppo scondào lo Piccirìddro mmiézzo a la chiazza e li recètte:
- Lascia stare la legge, d'ora in poi metti tutti i timbri che puoi se servono a distribui-re pane e a risparmiarti un altro bagno!
