Il brigantaggio post-unitario a Montella tra storia e fantasia.di Tullio Barbone
Pe’ dind’ a ‘ste mondagne
nge sóngo sèmbe stati
breàndi e malandrini
ra li tiémbi passati.
Ma ròppo Garibaldi,
carènno lo Borbóne,
pe’ ‘no mutivo o n’ato
crescètte ‘sto bobbóne.
‘Na massa re vagliùni,
chiamati pe’ sordati,
si riéro a la “cambagna”
pe’ ‘na sckoppètta armati;
mariuóli e dilinguèndi
re case abbandonàro
e pe’ no’ gghi ‘ngalera
a quiri s’ accocchiàro.
Si formào accussì
'na banda re breàndi
chi semmenàva attuórno
relùri, lutti e chiandi.
‘No certo Cicco Cianci
facìa lo capo banda,
uardànnolo mittìa
paura a tutti quanda.
Era ‘no pilirusso
chiuttosto vascio e chino
portava ‘na barbetta
e puro ‘n’ avricchìno.
Quann’ era ‘no vaglióne
già era ‘no furfande
chi ìa facènno scòla
pe’ arrevendà breànde.
Crescènno arrevendào
caìno, senza còre,
quanno tinìa vind’anni
chiù “dindo” stìa ca fòre.
Chi no’ li ìa a genio
te lo facìa a conzèreva,
addo’ passava isso
no’ ngi criscìa l’èreva.
Borbóni o Garibaldi
mìca lo ‘nderessàvano
pecchè erano r’ate
re cose chi condàvano.
A Cianci li fu facile
formà brèandi armati
mettènno tutti nziémo
‘sta massa re sbandati.
A mórra ‘sti breàndi
scurrìano la "cambagna",
re notte s’accambàvano
pe’ cìmma a la mondagna.
Rurmìano a cielo apiérto
o rind’a re pagliàra
e non se ne futtìano
re fa’ ‘na vita amara:
‘na vita re mucìrii,
sequestri e de ricatti,
re 'mbuósti e de vendette,
r’arruóbbi e de riscatti.
Saglìano re mondagne
chiù liésti re re crapi
parìa c’abbolàvano
liggiéri comm’a r’api.
Virìano re notte
chiù meglio re re gatti
passànno ro ‘nfrattùso
calàti quatti quatti.
Sindìano ‘no remóre
ra ‘no miglio londàno
o ‘no fruscìo re frasche
chi li sonàva strano.
Zombàvano li fuóssi,
scinnìano li vaddrùni,
mo’ erano a Mondéddra,
ma crài già a Ghifùni,
e dòppo còcche gghiuórno
già erano a Bagnùlo,
si re cercavi a Aciérni
erano a Barrizzùlo.
Furbastri “manutengoli”
tinìano ‘nformàta
re ogni spostamiéndo
la banda annaccoàta,
portavano mmasciàte,
spiavano li signuri,
re mòsse re la Forza
e de li traritùri.
Accussì li breàndi,
già primo re si mòve,
sapìano re non trovà
pe’ nnandi ‘rògne nòve.
Quann’era tutto próndo,
e gira cata gira
‘no ricco alandòmo
pigliavano re mira.
A lo posto ‘nzengàto
pe’ gghiuórni lo ‘mbostàvano
e quanno drà passava
re certo lo 'nguicchiàvano.
Mannàvano mmasciàte,
menàzze a familiari,
cercànno pe’ riscatto
‘no maro re renari.
E si po’ s’ accurgìano
re la male paràta
tinìano pe’ riquèsta
‘na mossa preparata.
A lo povero Cristo
tagliavano n’ avrécchia
e priésto a la famiglia
mannàvano ‘na ‘ndécchia.
Allora li pariéndi,
non sapènno che fa’,
mittìano ra parte
li sòrdi pe’ paà.
‘Sti sòrdi “...guaragnàti”
non se r’annaccoàvano,
no’ re tinìano appriésso,
ma priésto re spartìano:
‘na parte a la famiglia,
‘na parte a soci e spie,
e quéro chi restava
pigliava àte vie.
E succirìa accussì
‘no fatto assai curiùso:
te l’aspettavi tu
ca ne facìano ‘st’ uso?
La banda funzionava
quasi com’a ‘na banga,
mbrestàva li renari
a mano ritta e manga.
Accussì ‘no breànde
quasi s’assicurava
‘na rènnita sicura
pe' tutta la vecchiaia.
‘Sta specie re breànde
non era mai re còre,
non era Robbi Nudde
e mango ‘no signore.
Ngiarmàvano vendette
ferùci e assai bistiàli,
parìano chiù che uómmini
‘na specie r’animali.
Chi li facìa ‘no sgarro
avìa piroccolàte
e ndèrra lo finìano
a uócchi r’accettàte.
Re tutte re guagliòtte
chi avìano la sfortuna
re re trovà pe’ ‘nnandi
non ne lassàvano una.
Non stìano sèmbe suli
re notte li breàndi
avènno spesso visite
re ‘nnammoràte e amàndi.
Tinìano po’ vagliòtte
quasi sèmbe arrobbàte,
pe' cóse e cucinà,
ma senza èsse paàte.
Chi prattica lo zuóppo
si ‘mbàra a zuppichìa
e puro ‘ste guagliòtte
finiéro pe’ sparà.
Assètte po’ ‘na legge,
chiamata legge Pica,
chi pe’ sternà ‘ste bande
non pazziàva mica.
Mannàro ra lo Norde
sordàti e bersaglieri
quasi com’a ‘n’esercito
e puro carbiniéri.
Chiciùnga facìa parte
re ‘no gruppo armato
o era criminale
vinìa fucilato;
potètte capità
rind’a lo òsco stesso
senz’aocàti e giùrici
e senza ‘no pruciésso.
Chi po’ si conzegnàva
la pèddra salevàva,
ma la galera a bbita
nisciùno la levava.
Si po' iéri sospetto
“ozioso e vagabondo
complice o camorrista”
non t’aspettavi scondo.
A fatià forzato
vinìvi condannato,
ra càseta e famiglia
pe’ anni allondanato.
La legge lo chiamava
“domicilio coatto”:
si propio non murìvi
ra drà assìvi matto.
Non è ‘na bella cosa
però puro è succiéso:
‘sta legge ti primiàva
pe’ ogni breànde acciso.
E non mangàva chi
pe’ fa’ róppio uaràgno
‘na bòtta rìa a lo chirchio
e ‘n’ ata a lo tombàgno.
Pigliava ra la Forza,
pigliava ra la banda,
a la fine pigliava
pe’ féssa a tutti quanda.
Però a còcche breànde
‘sta gende li puzzava
te l’acchiappava ‘mbiétto
e la scolonozzàva.
‘Mmiézzo a ‘sto ngarauóglio
bastava ‘na sosciàta
la legge condannava
a bbòte a la cecàta:
chi a fatìà portava chiù
de quando si mangiava
pe’ “manutengolismo”
la Forza l’arrestava.
Famiglie sane sane
finìano ‘ngalèra,
però pe’ li breàndi
nisciùna léia ng’era.
Chi ngimm'a re mondagne
cucìa li caraùni
a bbòte si trovava
re frónde li spiùni:
- Vistìti, pane e bbino
portàti a li breàndi
pe' non passà 'no uàio
scondànnore pe' 'nnandi!
'Mbaurùto s'abbiàva
perciò lo poviriéddro
re bòtta capitato
tra 'ngùnia e lo martiéddro.
ma po' che succirìa
ca 'sto caraoniéri
a posto re breàndi
scondàva carbiniéri...
'Ngalèra lo portavano
pe' la combricità,
ma che giustizia era
re fatto quéra drà?
Ma pe’ ‘sta legge Pica
re bande si sfasciàro
e tutti li breàndi
perciò si sparpagliàro:
ngi fu chi s’arrendètte
e chi morètte acciso,
chi a bbita carcerato,
e cocchirùno appiso.
‘Na massa re sbandati
scappànno ètte angòra,
pe’ Cicco Cianci puro
era arrivata l’ora.
A lo monde Calvello
re guardie lo pigliàro,
‘ngimm’a lo posto stesso
drà te lo fucilàro.
'Ngimm'a 'no carro stiso
girànno lo portàro
finghé sott’a la tèglia
a bbista lo posàro.
Curriéro ra Fondàna,
ra Suório e da Arzàno,
ra tutto Sanzumióne,
ra Serra e Chiazzavano.
Curriéro ra lo Corso,
la Torre e li Lavrini,
ra cimma Tagliaòsco,
ra vascio li Curuìni.
La gende s’accanètte:
ngi fu chi lo sfreggiào,
chi lo pigliào pe’ féssa,
quaccùno li sputào.
Ngi fu còcche vigliacco
chi prima lo nginziàva,
pe’ non paré ‘no còmbrice,
ra muórto lo ngiuriàva.
Finìa accussì ‘na storia
pe’ certi r’avvendure
ma pe’ tand’ ati angòra
‘na storia re sciaùre.
Pubblicato sulla rivista IL MONTE anno XX n° 3 del 2023.
“Dai fatti alla fantasia: il racconto di Tullio Barbone e gli approfondimenti della redazione”
